فن و ثقافة

زجل .. مافي الهم

صدى24

ما في الهم

غير اللي كيفهم

وانت من الدنيا

خوذ وتعلم

ملي يقصاح عودك

ما تتعدي ما تظلم

دير الحد ووزن الكلام

ودير لفمك اللجام

ما تتعدى على الخلق

وما تخاف الا بغيتي

تقول كلام الحق

وما تتعلق فين تتفلق

وما تدخل على حبابك

حتى تدق

دير بحساب يجي نهار

ومعاهم تفرق

وعبر حساب رجليك

قبل ما تغيس وتغرق

ما في الهم

غير اللي كيفهم

راني معاك ساير نهضر

ونتكلم

ما تدير راسك مدمدم

لا تعرف تهضر ولا تتكلم

حتى واحد في هاد الدنيا

ما زاد معلم

الا دخلتي وسط الجماعة

يكون قلبك مسلم

وما تتكلم في الظلام

وسمع الكلام

يا بنادم

ما تنزل ايديك وقاوم

وعلى الخير بقى مداوم

ووسط لمواج خرج سالم

الا ما كنتي عوام

فيق من النعاس وما تولف

لحلام

وما تكون من الظلام

اللي يتجبرو على لقوام

ما في الهم

غير اللي كيفهم

فرق عظيم

بين لولد والربيب

ولخو والخال والعم

بغيت نقول الحق قال

لي سد الفم وزم

فيك شلة هضرة وبزاف

تتكلم

كلمات… خالد فولان.

الوسوم

اترك تعليقاً

لن يتم نشر عنوان بريدك الإلكتروني.

مقالات ذات صلة

زر الذهاب إلى الأعلى
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock