صدى24
الميمة
على غفلة جاتنا اخبار
الميمة عمارة الخيمة
علينا تضركات ومشات
فينك يا الميمة
وفين الضحكة والتبسيمة
فين المعدة والسينية
فين التشميرة والتحزيمة
فينك يا الجامعة لولاد والبنيات
فين لمتنا والبركة في العواشر
اخبارك يا الميمة فيقت الراكد
وربي علينا شاهد
وبلاصتك ما يأخذها حتى واحد
لامن يسكتني ويواسي يا الميمة
قلبي فيه غيمة
وشكون يعمر ديك الخيمة
مازلت نتفكر ديك الركدة
والخرجة في المحمل
غلبوني دموعي ما قدرت نكمل
والميمة ما ينسيني فيك لا عمة ولا
خالة
ملي مشيتي بقات حالتي حالة
هذا يقول قباح والآخر يقول
ولات فيه شلة بسالة
مشيتي يا الميمة وتضركتي
فين ولادك وفين دوك الخيات
كلشي مشى من حدانا وفات
فينك يا عمارة الخيمة
وخليتي حالتنا هايمة
مشيتي يا الميمة وتغيرات النظرة
وتبدل الكلام
قلت نحط راسي على خويا
ولد مي و بويا
بقيت أمانة بينكم يا الخيات
بقيت أمانة بينكم يا الخيات
بقيت أمانة بينكم ياالخيات
لا خاطري هنأت
وحالتي رشات وسالات
