صدى24
شحال گدك نتا تدوي
ر الدي ما يقضي والو
واش نتا تبقى غالفم و ما جاب
مول الرحبة شاد الگبضة على ديولو
و مخللي غير موالين الصنك يجولو
راسمال الصناكة ف الرحبة غير كلام
ولكلام كي لغمامة ف عز الصيف
وخا يضلو ويمسيو فالسوق يصولو
واش عارف اللي خلاها على هاذ الجرة
راهو اللي عطا شحال هاذي غي لهضرا
ما عارف معاني .. ما فاهم كلام
و گاع اللي حفظوه كلمة كلمة
بلا حيا وبلا تخمام يگولو
رحبة الدلالة كلامها محفوظ
البايع .. براسمالو شاد الحطة
والشاري بلا دراهمو مبهوض
جهد المسكين، بالعوينات يشوف
وشكون فهاذ الرحبة عليه يروف
وهما دايرين بحاللا ما كاين والو
مللي المطيشة .. هزات نيفها للسما
و اللوبيا، تحدفات من لوايح النعمة
مللي الزرع عطا بمرة التيساع لكيالو
واللحم .. بقا عد لكيال غا ف خيالو
غاتا ناضو ف الحملة صحاب الحال
و صوروا الأبطال حدا مول المحال
و مول المحال غا شاري باش يبيع
ويلا ما باعشي بالثمن غادي يضيع
و هو ما عندو مسكين ف لغلا والو
وكمموا الفام على لكبار
اللي منهم غلا واحتكار
و قلبوا الصورة وسباو الأسعار
في الحرب و في البرد الزمهار
أو واترني .. قاتل لميت هو غسالو
وفاين خير الفلاحة وخير جوج بحور
اللي هاجرو كيما هجر الشباب لمقهور
وهاكا خيرنا، مشا لعند غيرنا
ولمسكين تطحطحات حوالو
وا شحال گدك تبقى داوي خاوي
وف سوق الدلالة تبقى غي هاوي
وتا دير النية وسير لگدام
ونصل الثيقة من عتيقة
وما تخللي راسك ف التراب
وداير نفسك ما شايف والو
جمال مستكفي
14 فبراير 2023
